This article is available in English

Il-prezz jogħla tad-djar, l-inflazzjoni u s-salarji li ma jiżdidux, dan kollu għadma iebsa, speċjalment għaż-żgħażagħ fil-bidu tal-karriera tagħhom li qed jaħsbu biex jixtru l-ewwel propjetà tagħhom. Imma koppja żagħżugħa partikolari, li jixtru l-ewwel dar tagħhom sabuha ħaġa faċli, għallinqas meta tqabbilhom mal-ħbieb u l-kollegi tagħhom.

Dan il-privileġġ, din il-koppja ma tawhulhomx il-ġenituri tagħhom kif jiġri s-soltu, imma għenhom min iħallas it-taxxa, billi nzertaw impjegati tal-Partit Laburista u għandhom konnessjonijiet mill-viċin ma’ membri tal-Kabinett li għandhom ħafna pożizzjonijiet bi ħlas xi jqassmu.

Hemm għadd ta’ impjegati tal-Partit Laburista inkazzati minħabba din l-‘inġustizzja’, għax huma wkoll żgħażagħ li qed jippruvaw ileħħqu mal-prezz tal-propjetà, u lmentaw ma’ The Shift dwar din is-sitwazzjoni.

Qed igorru għax Trischia Falzon, id-deputy head of news fl-istazzjon tat-television ONE tal-partit, flimkien mal-boyfriend tagħha Ronald Vassallo, il-kelliem tal-Partit Laburista, qed ‘jinondawhom’ b’fondi tal-gvern, bis-saħħa ta’ ħatriet pubbliċi dubjużi, waqt li huma mhux qed ikunu ttrattati bl-istess mod.

Trischia Falzon għad għandha 26 sena u ilha taħdem mal-istazzjon tat-television tal-Partit Laburista minn mindu missierha, Frank Zammit, li kien il-bniedem tal-fiduċja tal-ex Ministru Nazzjonalista John Dalli, qaleb għal mal-Labour ftit wara li l-Prim Ministru diżonorat Joseph Muscat ħa l-ħatra fl-2013.

Minkejja l-esperjenza limitata tagħha, Falzon malajr imxiet ‘il quddiem fl-istazzjon tat-television tal-Labour. Dan jista’ jkun dovut għall-fatt li l-parti l-kbira tal-kollegi tagħha telqu mill-istazzjon meta tawhom xogħol imħallas mill-Istat fil-ministeri, fl-aġenziji pubbliċi u fl-Uffiċju tal-Prim Ministru.

Imma Falzon ma tantx batiet il-konsegwenzi talli baqgħet taħdem fl-istazzjon tat-television tal-Partit Laburista.

Fil-fatt, apparti l-promotion li ħadet għal deputy head of news, qed tgawdi wkoll bonuses ta’ ċertu portata li żgur se jgħinuha tħallas lura l-loan ġdida tagħha.

Tawha wkoll ħatra fil-bord tad-diretturi tal-Fondazzjoni għas-Servizzi tas-Social Welfare, qiegħda segretarju tad-Dwejra Steering Committee tal-gvern, kif ukoll tal-bord tal-appell tal-Aġenzija Residence Malta; dawn huma kollha ħatriet li titħallas tagħhom kull xahar. Imma barra minn hekk, aktar kmieni din is-sena, lil Falzon tawha kuntratt biex fil-ħin liberu tagħha, lill-Ministeru tal-Active Aging, tipprovdilu ‘servizzi fil-media soċjali’.

Din il-ħatra, il-kollegi tagħha sejħulha ‘kuntratt fażull’, imma bis-saħħa tagħha, Falzon se taqla’ 10,000 Ewro oħra fis-sena.

Din ir-reporter żagħżugħa, mhux magħruf x’kompetenza għandha biex tiġġestixxi l-media soċjali, u lanqas dan ix-xogħol għall-ministeru fi x’ħin se tagħmlu.

Sadanittant, sieħeb Falzon, Ronald Vassallo li kien reporter mal-ONE, issa għamluh kap tal-komunikazzjoni tal-Partit Laburista, billi l-predeċessuri tiegħu kollha emigraw għal impiegi mħallsa mill-gvern. Minbarra x-xogħol tiegħu fil-Headquarters tal-PL, lil Vassallo għamluh direttur f’isem il-gvern f’żewġ entitajiet tal-Istat: il-Malta Air Traffic Services u l-Housing Maintenance and Embellishment Company Ltd.

Din tal-aħħar hija l-istess kumpannija li kien uża Keith Schembri, l-ex chief of staff tal-prim ministru diżonorat Joseph Muscat, biex lil Melvyn Theuma, is-sensar fl-assassinju tal-ġurnalista Daphne Caruana Galizia, jagħtih job fantażma.

Imma billi għal Vassallo, dan kollu ma kienx biżżejjed, poġġewh ukoll fil-kumitat tal-European Film Awards, u b’hekk irnexxielu jikseb ħlas ieħor sinifikanti.

Il-kollegi ta’ Vassallo fi ħdan il-Labour stess, lil The Shift infurmawha li qed jitħallas ukoll minn ministeru ieħor bis-saħħa ta’ kuntratt direct order. Imma meta lil Vassallo tlabnih dan jikkonfermahx, baqa’ ma taniex risposta.