Indjan jixħet applikazzjoni diżonesta biex jissanzjona l-penthouses illegali ta’ Portelli

Read in English.

L-Awtorità tal-Ippjanar qed tevalwa l-possibbiltà li tissanzjona tnejn minn sensiela ta’ penthouses mibnija illegalment f’Ta’ Sannat, Għawdex, mill-iżviluppatur Joseph Portelli u s-soċji tiegħu Mark Agius, magħruf bħala Ta’ Dirjanu, u Daniel Refalo.

The Shift jista’ jiżvela li bilkemm laħqu għaddew xahrejn mis-sentenza tal-Prim Imħallef Mark Chetcuti li waqqgħet il-permess maħruġ illegalment lil Portelli, li ma tfeġġx applikazzjoni tal-iżvilupp f’isem ċittadin Indjan biex tissanzjona tnejn mill-penthouses illegali.

Permezz tas-servizzi ta’ Saviour Micallef, wieħed mill-periti ta’ Joseph Portelli, ċittadin Indjan ċertu Tarlochan Singh għadu kif ressaq l-applikazzjoni PA03869/24 quddiem l-Awtorità tal-Ippjanar “biex jissanzjona żewġ penthouses” fil-blokka tal-appartamenti mibnija minn Portelli f’Ta’ Sannat. Singh iddikjara li hu mhuwiex is-sid tal-penthouses.

L-iżvilupp kellu l-oġġezzjonijiet ta’ bosta NGOs u residenti. Il-kwistjoni tal-permess lil Singh biex jiġu ssanzjonati l-penthouses hi li dan ikun illegali wara s-sentenza tal-Qorti.

F’Marzu li għadda, wara xi tliet snin ta’ appelli, l-Ogħla Qorti f’Malta ħassret il-permess PA2035/21 li bih il-klikka ta’ Portelli bniet blokka appartamenti ta’ erba’ sulari f’Ta’ Sannat, kompluta b’pixxina komuni.

Billi l-iżviluppaturi ħadu vantaġġ mill-perjodu tal-appelli, kif tippermetti l-liġi u kif jippermetti l-gvern, huma laħqu lestew l-iżvilupp tagħhom qabel inqatgħet is-sentenza finali. Madankollu l-Qorti ddikjarat li s-sular ta’ fuq nett li kien diġà nbena u li jikkonsisti minn sensiela ta’ penthouses, kif ukoll il-pixxina komuni, kienu illegali.

Id-deċiżjoni tal-Qorti ma tistax tiġi appellata u hija finali.

Peress li l-penthouses huma illegali, dawn la jistgħu jintużaw, la jistgħu jinbiegħu, u lanqas jistgħu jinkrew, u għalhekk l-iżviluppaturi jeħtieġ iwaqqgħuhom. L-istess japplika għall-pixxina.

The Shift hu infurmat li minkejja s-sentenza finali tal-Qorti, l-Awtorità tal-Ippjanar għadha sal-lum ma ħarġet l-ebda ordni ta’ infurzar kontra l-iżvilupp illegali ta’ Portelli.

Dan jaf eventwalment jixħet lill-iżviluppaturi f’aktar problemi fil-qorti, li se jkollhom iseffqu wiċċhom ma’ talbiet għall-kumpens mingħand dawk li investew u xtraw xi proprjetà f’dan l-iżvilupp.