Konsulent tal-ARMS qed ‘jgħin’ lill-klijenti bil-kontijiet mhux imħallsin minn ġol-Kwartieri tal-Labour

“Konsulent” ta’ 73 sena mal-kumpanija tal-gvern responsabbli għall-kontijiet tad-dawl u l-ilma, l-ARMS, qed jaqdi lill-kostitwenti tal-Labour u lill-klijenti minn ġol-Kwartieri Ġenerali tal-Partit Laburista fil-Ħamrun.

Uffiċjali tal-ARMS li tkellmu ma’ The Shift bil-kundizzjoni tal-anonimità, qalulna li Joseph Picco, eks pulizija u koordinatur attwali tal-Labour f’Ħal Għaxaq, qed ikollu laqgħat regolari fil-kwartieri ġenerali tal-partit fil-gvern biex jiltaqa’ ma’ dawk li għandhom bżonn “l-għajnuna” biex iħallsu l-kontijiet tad-dawl u l-ilma tagħhom.

Is-sorsi kkonfermawlna li għal dan ix-“xogħol volontarju” tiegħu, il-pensjonant qed jitħallas madwar €1,000 fix-xahar mill-ARMS bħala konsulent, paga li tissupplimenta l-pensjoni tiegħu.

The Shift indipendentement ikkonferma li Picco hu mniżżel bħala “konsulent” mal-ARMS skont l-informazzjoni ppubblikata fil-Gazzetta tal-Gvern.

L-uffiċjali qalulna li Picco tqabbad biex jiltaqa’ mal-klijenti rrabjati, li rċevew kontijiet għoljin jew avviżi finali, li ġeneralment iwasslu għal sospensjoni tas-servizzi tal-ilma u tad-dawl.

Hu “jassistihom” biex isibu xi għamla ta’ soluzzjoni mal-ARMS. Uħud saħansitra qed jintbagħtu għand Picco mill-customer care tal-Uffiċċju tal-Prim Ministru, qalulna s-sorsi.

Marisa Ciappara, it-teżoriera tal-Partit Laburista, hi l-Uffiċjal Ewlieni tal-ARMS li għandha l-aħħar kelma fuq jekk klijent ikollux is-servizzi tiegħu sospiżi jew le.

“L-hekk imsejħa konsulenza ta’ Picco hi biex jgħaddi l-informazzjoni lil Ciappara. Imbagħad f’idejha biex issib soluzzjoni għall-klijenti rrabjati,” qalulna.

Picco kien kanvażer tal-eks ministru diżonorat Konrad Mizzi, u ilu għaddej bil-“konsulenza” tiegħu mal-ARMS għal bosta snin.

It-tliet uffiċjali ta’ fuq nett fl-ARMS huma lkoll involuti direttament fil-Partit Laburista.

Is-CEO hu George Azzopardi, li sal-aħħar elezzjoni ġenerali kien is-CEO tal-Partit Laburista magħżul mill-Prim Ministru Robert Abela.

Azzopardi kien eventwalment tneħħa minnufih wara r-rebħa tal-Labour b’Abela fit-tmun, u r-relazzjoni tiegħu mal-prim ministru marret għall-agħar. Madanakollu f’Settembru li għadda, Abela poġġieh CEO tal-ARMS b’pakkett finanzjarju ta’ €100,000 fis-sena.

Skont uffiċjali tal-ARMS li tkellmu magħna, Marisa Ciappara hi “l-boss vera” u l-Uffiċjal Ewlieni tal-Finanzi, u taqla’ xi €85,000 fis-sena. Bil-professjoni ta’ accountant, hi wkoll it-teżoriera uffiċjali tal-Partit Laburista u ngħatat bosta karigi oħra ta’ direttur fuq bosta bordijiet pubbliċi.

Is-sena l-oħra, The Shift irrapporta li Ciappara, bi ksur tal-kuntratt tal-impjieg tagħha, kienet qed tagħmel negozju ieħor waqt il-ħin tax-xogħol, inkluż permezz tal-kumpanija privata tal-immaniġġjar tal-proprjetà ma’ kuġinuha.

Minkejja l-evidenza tar-rwol kunfliġġenti tagħha, li ntbagħtet ukoll lis-CEO tal-ARMS, ma ttieħdet l-ebda azzjoni ta’ dixxiplina fil-konfront ta’ Ciappara.

It-tielet l-aktar uffiċjal importanti fl-ARMS, Nikita Zammit Alamango, hija l-President tas-sezzjoni tan-nisa tal-Labour, magħrufa bħala n-Nisa Laburisti. Anki hi qed tingħata pakkett finanzjarju ta’ €85,000 fis-sena bħala Uffiċjal Ewlieni tal-Operat tal-ARMS.