Il-perita mressqa fuq it-traġedja ta’ Jean-Paul Sofia tingħata xogħlijiet ġodda mil-Lands

Read in English.

The Shift jista’ jiżvela li l-perita mressqa l-qorti u akkużata bl-omiċidju involontarju ta’ Jean-Paul Sofia, fost akkużi oħrajn, ingħatat xogħlijiet ġodda mill-Awtorità tal-Artijiet permezz tal-uffiċċju privat tagħha.

F’Lulju 2023, il-perita Adriana Zammit kienet ġiet sospiża mill-impjieg full-time tagħha ma’ Infrastructure Malta. Madanakollu, ftit ġimgħat, l-Awtorità tal-Artijiet immexxija mis-CEO Robert Vella ma ħasbithiex darbtejn biex tagħti xogħlijiet ġodda lill-istess perita biex tipprovdi valwazzjonijiet ta’ art pubblika.

Wieħed minn dawn ix-xogħlijiet li tqabbdet Zammit tlesta f’Jannar 2024 u dan l-aħħar ġie ppubblikat fil-Gazzetta tal-Gvern.

Is-CEO ma weġibx il-mistoqsijiet ta’ The Shift dwar jekk dan kienx aġir aċċettabbli meta wieħed iqis li l-perita bħalissa qed taffaċċja akkużi kriminali kontriha fil-qrati b’rabta man-negliġenza tagħha f’xogħolha.

L-Awtorità rrifjutat ukoll li tipprovdi lista tal-kompiti kollha li tqabbdet Zammit minn mindu ġiet sospiża minn xogħolha. Irrifjutat ukoll li tiddikjara xi kemm-il pagament minn fondi pubbliċi ngħatat il-perita.

Il-perita, li qed tiċħad l-akkużi kontriha, lanqas hi ma wieġbet il-mistoqsijiet ta’ The Shift.

Min-naħa l-oħra, min jimpjegaha, Infrastructure Malta, ikkonfermat li Zammit għadha sospiża mill-aġenzija b’nofs paga.

Minkejja s-sospensjoni tagħha, Zammit iżda xorta waħda għad bil-warrant (il-liċenzja) ta’ perita u għada tipprattika fil-privat.

Il-Kamra tal-Periti m’għandhiex il-poter biex tissospendi l-warrant tagħha qabel jintemmu l-proċeduri fil-qorti.

F’Lulju 2023, Zammit ġiet akkuża fil-qorti b’omiċidju involontarju wara li inkjesta maġisterjali dwar il-qtil ta’ Jean-Paul Sofia kkonkludiet li hi “bin-negliġenza, b’nuqqas ta’ ħila fil-professjoni tagħha, jew b’nuqqas ta’ osservanza tar-regoli kkaġunat il-mewt.”

L-espert imqabbad mill-qorti fl-inkjesta, il-Prof Alex Torpiano, sab li Zammit “m’għamlitx il-kalkoli meħtieġa biex tiżgura l-istabbiltà strutturali” u “naqset milli tispezzjona s-sit tal-kostruzzjoni kif xieraq” – fabbrika ġo Kordin.

L-espert iddikjara wkoll li Zammit “ma wrietx il-ħila u l-għarfien professjonali meħtieġa fir-responsabbiltà tagħha bħala perit.”

Torpiano qal lill-inkjesta li l-bennejja tal-binja mġarrfa qalu li huma qatt ma kienu rawha lil Zammit fuq il-post u ammettew li l-istruzzjonijiet tax-xogħol kien qed jagħtihomlhom wieħed miż-żewġ żviluppaturi, Matthew Schembri, li poġġa lilu nnifsu fil-pożizzjoni ta’ meniġer tas-sit mingħajr kwalifiki biex jaqdi dan ir-rwol.

“Waqt il-fażi tal-kostruzzjoni tal-proġett, irriżulta li l-perita Adriana Zammit kienet qed tistrieħ fuq (ritratti bil-) WhatsApp biex tagħti struzzjonijiet ta’ kif għandu jissokta x-xogħol,” iddikjarat l-inkjesta.

“Skont il-messaġġi fuq il-WhatsApp tagħha, b’mod partikolari ma’ Matthew Schembri, jirriżulta li hi kienet isserraħ is-superviżjoni tax-xogħol fuq ir-ritratti tax-xogħlijiet li kien jibagħtilha Schembri nnifsu,” iżżid tgħid l-inkjesta.

L-aħħar ordni ta’ Sofia qabel il-binja ġġarrfet f’ħakka t’għajn kienu għal ritratti tal-konkos li kien għadu kif tqiegħed fuq is-saqaf u biex jibgħathom lill-perita.

Zammit kisbet il-warrant tagħha ta’ perit fl-2012 u ħadmet mal-Awtorità tal-Ippjanar għal bosta snin qabel imxiet lejn Infrastructure Malta.