Bniedem wieħed b’żewġ funzjonijiet ta’ CEO u b’żewġ salarji fil-ministeru tat-turiżmu

This article is available in English

L-Institute of Tourism Studies u l-Mediterranean Conference Centre huma żewġ entitajiet distinti tal-gvern, u t-tnejn li huma jiġu taħt il-ministeru tat-turiżmu. Oħroġ il-għaġeb, hemm imexxihom l-istess CEO b’żewġ kuntratti differenti ta’ impieg.

Din l-informazzjoni Pierre Fenech ikkonfermaha, imma ma riedx jgħid kemm qed jitħallas ta’ dawn iż-żewġ impiegi għolja mal-gvern; lanqas ma jrid igħid kif qed ileħħaq ma’ dawn iż-żewġ jobs ta’ CEO full-time, li flimkien jinħtieġu tal-inqas 80 siegħa xogħol fil-ġimgħa.

Clayton Bartolo, il-Ministru tat-Turiżmu, ukoll ma jridx jispjega kif tqabbad l-istess individwu bħala CEO f’żewġ entitajiet distinti tal-gvern.

It-talbiet Freedom of Information li saru liż-żewġ entitajiet tal-gvern għall-kopji ta’ dawn il-kuntratti, ġew irrifjutati wkoll. Ikkonfermaw li kienet saret il-ħatra ta’ CEO għaż-żewġ entitajiet, imma ma ridux jagħtu informazzjoni dwar il-kondizzjonijiet ta’ kull kuntratt.

Allura The Shift, lill-Kummissarju tal-Informazzjoni u l-Protezzjoni tad-Data, issa għamlitlu żewġ talbiet separati biex dawn iċ-ċaħdiet FOI jinvestigahom.

Qabel ma daħal jaħdem mal-gvern fl-2014, Fenech kien jaħdem il-Montekristo Estates, l-istabbiliment li l-iżviluppatur Charles Polidano (iċ-Ċaqnu) żviluppah illegalment.

Sorsi kemm fl-ITS kif ukoll fl-MCC, lil The Shift qalulha li Fenech ilu jokkupa dawn iż-żewġ pożizzjonijiet għal diversi snin, miż-żmien li l-ex ministru diżonorat Konrad Mizzi kien imexxi l-ministeru tat-turiżmu.

Mart Fenech, Romina, hija ħabiba tal-qalb ta’ Michelle Muscat, il-mara tal-ex-prim ministru diżonorat Joseph Muscat.

Fl-2020, meta l-entità statali Mediterranean Offshore Bunkering Co Ltd kien responsabbli għaliha politikament l-ex Ministru min-Naxxar Michael Farruġia, is-sinjura Fenech kienet inħatret membru tal-bord tad-diretturi tagħha. Il-koppja Fenech jivvutaw fil-kostitwenza ta’ Farrugia.

F’Diċembru tal-2021, The Shift kienet żvelat li lil ħu l-ministru tat-turiżmu, il-perit Gilbert Bartolo, Fenech kien tah direct order. U wara, lil The Shift, Fenech kien qalilha li ma kienx jaf li l-perit kien jiġi ħu l-ministru.

U ftit ġimgħat ilu biss, Fenech irrifjuta wkoll talba biex il-kuntratt ta’ Frank Fabri jippubblikah. Fabri huwa l-ex segretarju permanenti fil-Ministeru tal-Edukazzjoni li ntalab jirreżenja minħabba l-iskandlu ta’ Justyne Caruana.

Wara l-elezzjoni ġenerali, Fabri kienu tawh pożizzjoni għolja ġdida bħala general manager ta’ skola ġdida tat-taħriġ tal-ITS. Fenech ma riedx jispjega kif l-ITS issa għandha kemm CEO kif ukoll general manager f’daqqa.

Fenech huwa wkoll membru tal-bord ta’ kumpannija oħra tal-gvern, l-ITS New Campus Ltd, li fdata f’idejha għandha l-proġett tal-ITS Smart City, proġett li jiswa l-miljuni ta’ Ewro. Il-proġett ilu għal diversi snin fil-fażi tal-pjanifikazzjoni, imma s’issa għadu ma sar l-ebda progress.