Read in English.

Iċ-chairman tal-Orkestra Filarmonika Nazzjonali, Alfred Camilleri, għadu kif irreżenja mill-kariga tiegħu hekk kif bħalissa qed jiġi akkużat kriminalment fil-qorti abbażi tas-sejbiet tal-inkjesta maġisterjali dwar il-ftehim tat-tliet sptarijiet.

Camilleri, li sa ftit snin ilu kien l-ogħla uffiċjal taċ-ċivil fil-ministeru tal-finanzi, qed jiġi akkużat bi frodi u abdikar tad-doveri, fost l-oħrajn, abbażi ta’ dak li nstab waqt l-inkjesta tal-maġistrat dwar il-ftehim frawdulenti tal-isptarijiet lil Vitals/Steward.

Meta kien ġie nnegozjat dan il-ftehim, hu kien is-segretarju permanenti tal-ministeru, u baqa’ f’dik il-kariga tul ħafna mill-perjodu tal-konċessjoni.

Camilleri, flimkien ma’ żewġ uffiċjali anzjani oħrajn, l-eks Segretarju Permanenti tal-Ministeru tas-Saħħa (illum irtirat) Joseph Rapa u s-Segretarju Permanenti tal-Ministeru tal-Ekonomija Ronald Mizzi, qed jiġu akkużati li għalqu għajnejhom għalkollox meta kien jiġi miftiehem dak il-ftehim multimiljunarju.

Hu kien wieħed mill-uniċi segretarji permanenti li ħadmu taħt amministrazzjoni Nazzjonalista u li baqgħu fil-kariga tagħhom fl-2013 meta nbidel il-gvern.

Camilleri qed jikkużat b’reati li kellu d-dover li jevita; madankollu hu qed jiċħad li kien jaf x’kien qed jiġri dak iż-żmien meta kien qed jiġi miftiehem il-ftehim.

Camilleri, ta’ 64 sena, hu membru tal-kumitat finanzjarju tal-Kurja u flimkien mal-Arċisqof jieħu l-aktar deċiżjonijiet finanzjarji importanti għall-organizzazzjoni. Camilleri hu wkoll membru tal-bordijiet tad-diretturi ta’ żewġ kumpaniji elenkati li huma proprjetà tal-Grupp Corinthia.

Fi stqarrija maħruġa fl-għodwa tal-Erbgħa, il-Ministru tal-Kultura Owen Bonnici qal li Camilleri “kien, hu u jibqa’ ħabib veru u leali tas-settur tal-arti u l-kultura.” Bonnici żied jgħid li Camilleri wettaq bidliet sinifikanti matul il-kariga tiegħu.

Iżd’issa din il-kariga se tkun qed tokkupaha Odette Vassallo.