Opinjoni: Jason ġenjali

Read in English.

“Kull stħarriġ fl-aħħar xahrejn mar żmerċ. Imbagħad sar l-istħarriġ vera tal-polz tal-poplu. Personalment, kont naf li d-distakk bejn iż-żewġ partiti kien se jonqos.” Hekk ħareġ jikkummenta l-guru veteran Laburista Jason Micallef wara li l-Labour tilef eluf ta’ voti fl-elezzjonijiet tal-Parlament Ewropew.

Kulħadd ġabha ħażin, ħlief hu. Insew is-sondaġġi, waqqfu l-istħarriġ u itfgħu lil Vince Marmara ‘l barra. Id-darba li jmiss, meta tkunu tridu ssiru tafu kif se jivvota l-pajjiż, sempliċiment aqbdu u staqsu lil Jason.

Hu dejjem jaf kollox; Jason ġenjali. Seta’ jiffranka ħafna ħin, skariġġ u flus ukoll lil ħafna nies għax hu kien jaf minn qabel x’kien se jiġri, għax hu inzerta Jason Micallef, il-bniedem li għandu subgħajh fuq il-polz tal-poplu.

“Il-Labour reġa’ rebaħ l-elezzjonijiet tal-Parlament Ewropew. U l-PN reġa’ tilef,” qalilna Jason Micallef fil-post tiegħu fuq Facebook. Imma għal xi raġuni stramba, xorta waħda ma bediex jiċċelebra.

Beda jipponta subgħajh lejn kulħadd ħlief lejh innifsu għat-telfa kbira li għamel il-Labour fl-elezzjonijiet tal-MEPs.

Irrispettivament mit-tlellix li jippreżenta l-Labour b’rabta ma’ dan ir-riżultat, il-Labour xorta tilef bil-kbir. Tilef il-maġġoranza tas-siġġijiet Maltin li kellu fil-Parlament Ewropew, fosthom ir-raba’ siġġu tant mixtieq. Tilef ukoll il-maġġoranza assoluta li kien irnexxielu jikseb ħames snin ilu fl-2019, meta l-Labour kien rebaħ 54.29% tal-voti mitfugħa.

Did-darba, rebaħ biss 45.26% tal-voti, jiġifieri l-agħar riżultat għal-Labour mill-1966 ‘l hawn. Il-Labour tilef ukoll il-vantaġġ impotenti li kellu ta’ 42,700 vot fl-2019, għal vantaġġ ċkejken ta’ 8,454 vot li ġab did-darba. Dan ifisser xaqliba ta’ 34,246 vot mil-Labour għal għand il-Partit Nazzjonalista f’ħames snin.

Din telfa kbira għal partit li dejjem kien qed jirbaħ. U Jason jaf eżattament għalfejn il-Labour tilef b’dawk in-numri: għax hu – il-kbir Jason Micallef – ma kienx involut f’din il-kampanja. “Jien ili involut fil-kampanji elettorali tal-Partit Laburista għal 25 sena. Din kienet l-ewwel kampanja elettorali tal-Labour li ma kont involut fiha xejn.”

Nispera li tal-Labour qed jisimgħu x’qed jgħid. Qed tara x’jiġrilkom meta twarrbu lil Jason? Mingħajr Jason, telfa biss għandkom.

“Ma kinitx l-għażla tiegħi,” ikkjarifika, “Kienet l-għażla ta’ ħaddieħor” (u hawn qed iħares lejk Robert Abela). Qrajtu x’kiteb? Ir-raġuni ewlenija għalfejn il-Labour ġie kkastigat b’dak il-mod hija għax Jason Micallef “ingħata l-ġenb b’mod sistematiku”.

Tal-Labour m’għandhomx għalfejn iħabblu rashom fuq analiżi ta’ wara l-elezzjoni, u m’għandhomx għalfejn joqogħdu jqattgħu xagħarhom fuq ir-riżultati. Għandhom lil Jason.

Kieku ma baqgħux iwarrbuh sistematikament u jeskluduh b’mod mill-aktar kattiv, kieku kien jgħidilhom dak kollu li jeħtieġ ikunu jafu. Għax hu jaf sew għalfejn il-Labour ġie umiljat b’dak il-mod. U billi Jason hu Jason, mhuwiex iżomm lura: qal kollox bla tlaqliq f’post fuq Facebook qabel biss intalab.

Skont Jason, il-Labour ma tilifx biss għax il-partit sistematikament neħħa lil kull min serva lill-Partit Laburista matul is-snin, iżda anki għax il-ministri tal-kabinett bdew jaġixxu qishom “teenagers” fuq il-midja soċjali, qal Micallef. Il-Labour tilef għax, fi kliem Jason, kien hemm “nuqqas ta’ koordinazzjoni qawwija bejn l-awtoritajiet u l-aġenziji tal-gvern b’rabta mal-proġetti infrastrutturali.” It-toroq magħluqa, it-tħaffir tal-gandotti u s-sriebet tat-traffiku infurjaw lin-nies. Insomma, għandu punt hemmhekk.

Iżda dan mhux kollox. Ir-raġuni l-kbira l-oħra wara r-riżultat katastrofiku tal-Labour kienet “l-istrateġija konfuża (tal-partit) dwar l-Inkjesta (Vitals).”

Skont Jason Micallef, il-falliment tal-Labour ġara għax il-partit ma appoġġax b’mod ċar “l-innoċenza” ta’ Joseph Muscat.

“Jien konvint li l-maġġoranza tal-partitarji Laburisti ħassew li l-eks mexxej u prim ministru u żewġ eks ministri tħallew waħedhom,” ikkummenta. “Dan il-fatt iddiżappunta ferm lill-għeruq tal-partit.”

U hemm iżjed kliem ta’ għerf f’li kiteb. Il-kampanja ddeċidiet li tagħmel “kunċert u ċelebrazzjonijiet enormi li taw l-impressjoni li l-Labour kien qed jiċċelebra, u dan qabel ma n-nies kienu ħarġu jivvutaw.” Ħeq, għandu punt hawnhekk ukoll.

Dan hu l-partit li jakkuża lil ħaddieħor bl-arroganza. Ma tgħallmu xejn minn dak li kien ġralu Chris Fearne: ank’hu kien organizza festa tar-rebħa u stieden lir-rival tiegħu Robert Abela biex jingħaqad miegħu, meta l-partitarji lanqas biss kien għadhom bdew jivvutaw. U dakinhar ilkoll nafu x’ġara.

Il-Labour illum qed jerġa’ jagħmel l-istess: organizza kunċerti tar-rebħa meta l-votazzjoni lanqas biss kien għadha bdiet. U dawk iċ-ċelebrazzjonijiet kbar kellhom jitħassru.

Il-Labour issa għandu biss vantaġġ ċkejken ta’ 3.2% fuq il-PN. U dan ifisser inqas mill-voti invalidi mitfugħa: 9,884 vot b’kollox.

Daqs hekk hi l-ħajta vantaġġ li għandu l-Labour fuq il-PN. U l-affarijiet jistgħu biss ikomplu sejrin għall-agħar għal-Labour. Infatti d-deputat mexxej tal-partit, Daniel Micallef, irreżenja fi żmien 48 siegħa mill-ħruġ tar-riżultati devastanti, iżda qal li hu ilu sentejn li daħħalha f’rasu li jirreżenja.

…Ma kienx l-agħar riżultat elettorali għal-Labour mill-1966 ‘l hawn li waslu biex jitlaq.

…Ma kienx il-fatt li Robert Abela tellef lill-partit ħemel ta’ eluf ta’ voti jew li ħareġ tal-aktar mexxej Laburista mhux popolari mal-elettorat ta’ kull żmien.

Lanqas Karmenu Mifsud Bonnici ma kien irnexxielu jġib riżultati ħżiena daqshekk fl-1987 jew fl-1992!

Imma agħmlu l-qalb – Jason Micallef għandu s-soluzzjonijiet. Jaf kif se jsewwi l-affarijiet għal-Labour. “Iż-żmien hu favur tal-Partit Laburista,” ħabbar. “Hemm biżżejjed ħin u ċans biex l-affarijiet jissewwew għall-aħjar.”

Allura x’inhi s-soluzzjoni inġenja li għandu Jason għal-Labour? Kif qed jipproponi li jġib lura l-ħemel ta’ eluf ta’ votanti li telqu lil-Labour?

Hawn hi s-soluzzjoni ta’ Jason: “L-appell ġenwin tiegħi jibqa’ l-istess bħalma dejjem kien – (ħudu ħsieb) l-interess tal-Partit Laburista u tan-nies tiegħu, dejjem u kullimkien.”

Il-lapazzata malajr malajr li qed jipproponi Jason Micallef hi biex il-Labour ikompli jaljena aktar u aktar lill-popolazzjoni, jantagonizza aktar u aktar lill-pubbliku, u biex idawwar aktar voti kontra l-Partit Laburista billi jagħmilha ċara espliċitament li l-Labour qiegħed fil-poter biex jaqdi biss l-interessi tiegħu u tan-“nies tiegħu”.

Proset Jason. X’nagħmlu mingħajrek?