Il-benefiċċji kontinwi lil Michelle Muscat

Waħda mill-istejjer riċenti ta’ The Shift iddeskriviet kif Michelle Muscat, iċ-chairperson tal-Fondazzjoni Marigold u mart l-eks prim ministru diżonorat Joseph Muscat, biddlet id-deżinjazzjoni taż-żewġ xufiera tagħha ffinanzjati mill-Istat Malti u sekondati fl-NGO tagħha, waqt li kienet għaddejja investigazzjoni dwar kif kienet qed tonfoq il-flus mogħtija mill-gvern.

Dawn iż-żewġ xufiera, sekondati wieħed mid-Dipartiment tat-Tindif u l-ieħor minn Transport Malta, issa bdew jissejħu “meniġers loġistiċi” hekk kif il-Kummissarju għall-Istandards qed jinvestiga dikjarazzjonijiet li abbużat mill-fondi pubbliċi.

Aktar kmieni din is-sena, The Shift irrapporta wkoll kif, wara mistoqsijiet parlamentari tad-deputata Nazzjonalista Claudette Buttigieg, Abela ammetta li Michelle Muscat ingħatat il-possibbiltà li tuża karozza mħallsa b’kollox, mixtrija u ffinanzjata mill-gvern.

Il-pjanijiet tal-proprjetà tal-Prim Ministru

The Shift żvela kif il-Prim Ministru Robert Abela u martu Lydia kienu ressqu applikazzjoni tal-ippjanar għall-iżvilupp biex ibiddlu dar antika li għandhom fix-Xewkija Għawdex, f’residenza kbira b’seba’ kmamar tas-sodda lkoll bi kmamar tal-banju en suite, pixxina interna taħt l-art, spa u faċilitajiet tal-ġimm.

Ftit wara r-rappurtaġġ ta’ The Shift, ġew ippreżentati pjanijiet ġodda mill-perit veteran Joe Cassar f’isem Robert u Lydia Abela li issa kienu mmarkati bħala “Xewkija Guest House” minflok bħala “Residential Development” kif kienu qabel. Eventwalment, il-kopja kisbet ukoll l-art biswit f’ċirkostanzi dubjużi biex iżżid il-valur tal-proġett turistiku tagħhom u biex din tiżdied mal-portafoll tal-proprjetà tagħhom, filwaqt li l-prim ministru jkun jinsab imħabbat ħafna bit-tmexxija tal-pajjiż.

Sena ħażina għar-RHIBs ta’ Transport Malta

The Shift irrapporta kif waħda mill-ħames dgħajjes ġodda msejħa Rigid Hull Inflatable Boats (RHIBs) li xtrat Transport Malta għat-taqsima tal-infurmar marittimu tagħha kienet diġà ddikjarata li mhix tajba għall-baħar u kellha tiġi skreppjata, filwaqt li l-erbgħa l-oħra nstabu li kellhom problemi strutturali serji.

Meta The Shift staqsa lil Transport Malta biex tipprovdi rendikont tan-nefqiet fuq dawn ir-RHIBs, is-sejħa għall-offerti li kienu nkisbu permezz tagħha, u lista tal-ħlasijiet li saru fl-aħħar sentejn fuq it-tiswijiet ta’ kull waħda mir-RHIBs, ir-regolatur tat-trasport f’pożizzjoni mill-aktar skomda ma riedx jipprovdi din l-informazzjoni.

Is-Serqa tal-Isptarijiet

The Shift kien parti minn investigazzjoni konġunta mal-Proġett tar-Rappurtaġġi dwar il-Kriminalità Organizzata u l-Korruzzjoni (OCCRP) u t-Times of Malta li ħarġet fid-dieher kif il-kuntratt tal-konsulenza tal-eks prim ministru diżonorat Joseph Muscat ma’ kumpanija Żvizzera hu ssuspettat li għadda flus pubbliċi lura lill-investituri wara l-Vitals Global Health Care Group (VGH), li bħalissa qed jiġu skrutinizzati fid-dettall mill-investigaturi.

L-investigazzjonijiet skoprew ukoll li l-kumpaniji involuti fil-ftehim tal-konċessjoni tal-isptarijiet bagħtu mill-anqas €7 miljun lil Accutor. Din il-kumpanija tal-payroll Żvizzera kellha rwol kruċjali fiċ-ċaqliq tal-flejjes bejn l-investituri. Dawn l-istess investituri mbagħad nefqu miljuni tal-ewro b’mod axxellerat filwaqt li injoraw għalkollox l-isptarijiet tal-poplu li suppost kellhom jieħdu ħsieb.

Ninnamraw mal-Qatar

L-artiklu investigattiv ta’ The Shift imsejjaħ “Ninnammraw mal-Qatar: lil dawk li allegatament jiffinanzjaw lit-terroristi, il-President jistidinhom jinvestu f’Malta” żvela kif il-President George Vella pprova jattira investiment mingħand biljunarji Sirjani residenti fil-Qatar li xahrejn qabel kienu qed jiġu akkużati li ffinanzjaw grupp terrorista affiljat mal-Al-Qaeda.

Sussegwentement, The Shift żvela wkoll li l-gvern tal-Qatar kien għamel tajjeb għal ħafna mill-ispejjeż tal-bosta delegazzjonijiet minn Malta li kienu żaru l-Qatar fuq medda ta’ ftit xhur. L-artiklu kien intgħażel fost il-finalisti tal-Premju tal-Parlament Ewropew għall-Ġurnaliżmu Investigattiv imsemmi għal Daphne Caruana Galizia.

Il-kaċċa u l-fondi tal-UE moħlija

Investigazzjoni li wettaq The Shift f’diversi pajjiżi flimkien ma’ bosta sħab internazzjonali ħarġet fid-dieher kif mijiet tal-eluf tal-ewro mill-fondi tal-Istati Membri kienu qed jinħlew minħabba l-kaċċa f’Malta, prattika li qed titħalla għaddejja bi ksur tar-regoli tal-UE u bil-palata tal-gvern Malti biex “jassigura l-voti mil-lobby tal-kaċċa u l-insib”.

Kumplessi Sportivi nofs leħja

F’Mejju li għadda, The Shift żvela kif bosta proġetti sportivi f’Malta ma kinux tlestew, fosthom il-pixxina nofs leħja fir-Rabat Għawdex li swiet lill-poplu €16-il miljun, kumpless tat-tennis f’Pembroke li sewa lill-poplu €3 miljun u li kien għadu fil-bidu nett tiegħu, u kumpless tal-indoor squash u l-weightlifting fil-Marsa li sewa lill-poplu €9 miljun u li kien għad lanqas kellu l-pedamenti f’posthom.

Ir-raba’ proġett nofs leħja kienet il-pixxina interna tal-Kumpless Sportiv tal-Kottonera li swiet lill-poplu €14-il miljun u li suppost kellha tintuża waqt il-Logħob tal-Pajjiżi ż-Żgħar tal-2023, iżda minflok l-atleti u l-persunal tal-GSSE kienu kostretti jużaw il-pixxina Tal-Qroqq li kienet inbniet fl-1993.