Read in English.

Il-Kelliem tal-Oppożizzjoni Karol Aquilina qal fi stqarrija li s-sistema ġudizzjarja ta’ pajjiżna rnexxielha tirbaħ il-pressjoni li għamlilha l-Prim Ministru Robert Abela, hekk kif il-qorti llum iddeċidiet li hemm biżżejjed evidenza biex l-eks Deputat Prim Ministru Chris Fearne u l-Gvernatur attwali tal-Bank Ċentrali Edward Scicluna, fost l-oħrajn, jgħaddu ġuri.

Din id-deċiżjoni tal-qorti tfisser li issa xxejnu għalkollox it-tamiet tal-eks Deputat Prim Ministru Chris Fearne li jikseb xi kariga fil-Kummissjoni Ewropea. Tfisser ukoll li se jissoktaw is-sejħiet biex il-Gvernatur tal-Bank Ċentrali jirreżenja mill-kariga attwali tiegħu.

Fearne kien il-ministru tas-saħħa meta kien qal lin-nies li l-konċessjoni tat-tliet sptarijiet tal-Maltin u l-Għawdxin lil Steward Healthcare kienet ir-“real deal” minkejja evidenza ppubblikata mill-ġurnalisti dwar il-ftehim frawdulenti li l-gvern kien għamel mal-Vitals Global Healthcare.

Steward Health Care ħadet f’idejha l-konċessjoni mingħand il-Vitals Global Healthcare għal ewro biss, f’nofs kontroversja ta’ frodi u korruzzjoni. Eventwalment, il-ftehim ġie ddikajrat null mill-qorti Maltija.

Il-Gvernatur attwali tal-Bank Ċentrali Edward Scicluna kien il-ministru tal-finanzi meta sar dan il-ftehim. Skont ma ddikjara hu stess, hu ma kienx infurmat bl-iżviluppi li kienu qed isiru, u li d-deċiżjonijiet kien ħadhom il-“kitchen cabinet” tal-eks prim ministru diżonorat Joseph Muscat. Minkejja dan, il-qorti xorta waħda ddeċidiet li hemm evidenza biżżejjed biex jissoktaw il-proċeduri kontrih.

Is-sentenza issa qed twassal għal bosta sejħiet biex il-Gvernatur tal-Bank Ċentrali jirreżenja, fosthom mill-MEP David Casa, li staqsa x’għandu jkun biex Scicluna jagħżel li jirreżenja. Minkejja dawn l-appelli, iżda, Scicluna għamilha ċara li ma kellu l-ebda ħsieb li jirreżenja u li ħadd ma seta’ jkeċċih.

Anki l-Kap tal-Oppożizzjoni Bernard Grech sejjaħ għar-riżenja immedjata tiegħu, u qal li “Kull jum li jgħaddi Robert Abela qed jikkonferma aktar li huwa kien u għadu kompliċi fl-akbar frodi li qatt seħħ f’pajjiżna.”

L-akkużati qed jitressqu l-qorti fuq frodi. Oħrajn, fosthom l-eks segretarji permanenti Alfred Camilleri u Joseph Rapa, l-eks avukata tal-VGH Deborah Chappell u s-segretarju permanenti attwali Ronald Mizzi, qed jitressqu wkoll fuq miżapproprjazzjoni.

Akkużati hemm ukoll l-avukati Kevin Deguara, Kenneth Deguara u Jean Carl Farrugia minn DF Advocates, ditta li kienet involuta f’diversi ftehimiet kontroversjali kbar meta Keith Schembri kien chief of staff f’Kastilja.