Żieda ta’ €90,000 lill-Kummissarju tal-Films Johann Grech minkejja l-iskandli

Read in English.

Il-Prim Ministru Robert Abela għadu kif żied il-pakkett finanzjarju annwali tal-Kummissarju tal-Films Johann Grech b’€90,000, għal €150,000 fis-sena, kważi l-paga ta’ ministru għal tliet darbiet.

Għal bosta snin, il-gvern ma riedx jiżvela l-kuntratti tal-ingaġġ ta’ Grech, iżda l-kuntratt il-ġdid tiegħu ffirmat fl-2023 għall-erba’ snin ta’ wara u li wasal f’idejn The Shift permezz ta’ talba tal-libertà tal-informazzjoni (FOI), joħroġ fid-dieher pakkett ta’ iżjed minn €150,000 fis-sena. Għalhekk joħroġ fid-dieher ukoll żieda ta’ €90,000 fuq il-pakkett ta’ qablu, għax skont tweġiba parlamentari fl-2020, hu kien qed jaqla’ €60,000 fis-sena dak iż-żmien.

Il-kuntratt il-ġdid li ngħata jsemmi li apparti s-salarju bażiku ta’ €115,000 fis-sena, Grech jingħata €11,500 bħala “disturbance allowance”, €10,000 għall-ispejjeż, karozza mħallsa b’kollox u mobile phone, li jakkumulaw pakkett finanzjarju annwali ta’ iżjed minn €12,500 fix-xahar.

Il-kuntratt mogħti lil Grech isemmi wkoll li hu intitolat għal rimborż tal-ispejjeż kollha barra minn pajjiż, fosthom l-ispejjeż biex jospita l-mistednin tiegħu, tal-akkomodazzjoni, u l-ħlasijiet ta’ tariffi mhux magħrufa għal sħubijiet f’assoċjazzjonijiet u għaqdiet relatati mal-industrija tal-films.

Awwissu 2023: Ftit żmien wara li kien għadu kif nefaq il-miljuni fuq festival, Grech jingħata kuntratt ġdid b’żieda ta’ €90,000 fis-sena.

Grech, li sal-2013 kien impjegat ma’ kumpanija żgħira Għawdxija tal-marketing, kien inħatar uffiċjal ewlieni tal-marketing għall-eks prim ministru diżonorat Joseph Muscat.

Imbagħad fl-2015, hu kien inħatar Kummissarju tal-Films u dan minkejja l-esperjenza limitata tiegħu fis-settur.

L-aħħar sitt snin tiegħu fil-kariga kienu miżgħuda deċiżjonijiet kontroversajli li berbqu l-miljuni tal-ewro b’direct orders fuq avvenimenti ekstravaganti bla bżonn, li wħud minnhom saru għall-benefiċċju tal-PR tal-Partit Laburista fi żminijiet kritiċi lejliet kampanja elettorali.

Dan l-aħħar, ġie żvelat ukoll li fl-2022 – is-sena tal-elezzjoni – Grech kien nefaq €120,000 biex iqabbad lill-kummidjant Ingliż David Walliams jippreżenza ċ-ċerimonja tlellex tal-għoti tal-awards tal-films.

Il-gvern ftit li xejn ipprova jwaqqaf it-tberbiq ta’ Grech, inkluż in-nefqa li taqbeż is-€600,000 fuq is-safar, il-miljuni stmati li ntefqu għal dik is-serata tal-Malta Film Awards fl-2022, u l-infiq għall-Festival tal-Films Mediterrane fl-2023, fost il-bosta avvenimenti grandjużi.

Barra minn hekk, lill-produtturi tal-film Gladiator allokalhom rifużjoni mit-taxxa u inċentivi bla preċedent ta’ €47 miljun, u dan filwaqt li rrabja lil bosta mill-industrija tal-films lokali u barranija.

Filwaqt li l-Ministru tat-Turiżmu Clayton Bartolo pprova jiġġustifika l-infiq axxellerat ta’ Grech bħala “investiment” fl-ekonomija Maltija, hu baqa’ ma jridx jippubblika l-istudju li ddikjara li għal kull ewro li jonfoq Grech, Malta kienet qed tieħu tlieta.