This opinion was originally written in English. This below is a translation.
“Illum, għall-ewwel darba f’aktar minn sitt snin taħt il-mantra soffokanti li “l-ebda politiku jew persuna f’kariga pubblika ma kienu involuti fl-assassinju”, għandna xhieda ġuramentata ta’ involviment politiku fl-omiċidju ta’ Daphne Caruana Galizia.” Hekk kiteb Christian Grima fuq Facebook wara li George Degiorgio kkonferma d-dikjarazzjoni tiegħu bil-ġurament.
George Degiorgio, li ġie kkundannat 40 sena ħabs għall-involviment tiegħu fl-assassinju ta’ Caruana Galizia, tħarrek biex jixhed fil-kawża li kien fetaħ l-eks prim ministru diżonorat Joseph Muscat.
Muscat kien fetaħ libell lill-avukat Christian Grima.
Fuq il-programm Xtra ta’ Saviour Balzan, Michelle Muscat kienet tkellmet bla misħtija ta’ xejn. Kienet qaltilna li hija għandha aktar għalfejn jiddispjaċiha talli ġralha dak li ġralha (Daphne Caruana Galizia) mill-familja tagħha stess. “Għax issa se jkolli ngħix bil-gideb tagħha,” kompliet tgħid dakinhar Michelle Muscat.
Christian Grima mbagħad kien kiteb fuq Facebook, “Ġralha dak li ġralha? Splodieha żewġek, Michelle. Dak li ġralha.” u l-kumment ta’ Grima jidher li qajjem il-kuxjenza ta’ Muscat mill-mewt. “Ma nista’ qatt naċċetta gideb bħal ta’ Grima,” kien qalilna u ddeċieda li jiftaħ kawża ta’ libell kontrih fil-Qorti. Imm’issa żgur li qed jiddispjaċih.
Grima ħarrek lil George u Alfred Degiorgio biex jixhdu fuq il-pedana tax-xhieda. Bosta sorsi tal-midja rrappurtaw li dawn iż-żewġt aħwa kkundannati ma ridux jixhdu, iżda dan mhux preċiż għalkollox. George Degiorgio, għall-ewwel darba, ikkonferma bil-ġurament id-dikjarazzjonijiet li kien għamel dwar l-assassinju ta’ Caruana Galizia.
Qal li l-offerta finta ta’ miljun ewro għall-informazzjoni (dwar l-assassinju ta’ Caruana Galizia) kienet logħba ħalli dawk li kienu involuti verament jidhru innoċenti. Skont id-dikjarazzjoni ta’ Degiorgio, hu u ħuh qed jiddikjaraw li f’dan il-każ hemm l-involviment ta’ bosta persuni prominenti mid-dinja politika li kienu jokkupaw pożizzjonijiet ministerjali fil-pajjiż.
Il-gvern ta’ Joseph Muscat kien għamel offerta “bla preċedent” ta’ miljun ewro lil min kien lest jersaq ‘il quddiem u jipprovdi informazzjoni lill-pulizija li twassal biex jiġu identifikati dawk responsabbli għall-assassinju tagħha. Madankollu, dik l-offerta kienet saret b’ħafna kundizzjonijiet, fosthom li kull min jagħti l-informazzjoni kellu jgħid il-verità u l-verità kollha, u jixhed bil-ġurament dwar kollox, u allura safrattant jikxef l-identità tiegħu.
Inkella, jekk l-informanti riedu jibqgħu anonimi, kellhom imorru għand il-pulizija, li d-deputat kummissarju tagħha kien il-ħabib ta’ ġewwa ta’ Yorgen Fenech, Silvio Valletta, u li l-kummissarju tagħha kien għadda informazzjoni lis-sensar fl-assassinju.
Degiorgio, fid-dikjarazzjoni ġuramentata tiegħu, allega li fil-każ ta’ Caruana Galizia, l-eks kummissarju u uffiċjali għoljin oħrajn fil-korp tal-pulizija kienu involuti wkoll, u daqstant ieħor kienu xi persuni ta’ fiduċja. Qal li huma jistgħu jixhdu dwar l-involviment tal-eks ministru Chris Cardona u ta’ Keith Schembri.
Barra minn hekk, Degiorgio għamel akkużi iżjed serji. Qal li dawn il-fatti kienu nġiebu għall-attenzjoni tal-Prim Ministru Robert Abela kif ukoll tal-kummissarju tal-pulizija u ta’ uffiċjali għoljin oħrajn fil-korp.
Degiorgio allega li filwaqt li huma jridu li l-verità toħroġ kollha, jidher ċar li dan ma jistax jiġri għax dak li ġie miftiehem internament irid jiġi onorat. Qal ukoll li huma qed jagħmlu din id-dikjarazzjoni fil-pubbliku wara li diġà għaddew informazzjoni sensittiva u siewja lill-pulizija iżda l-pulizija m’għamlu xejn.
Insistew li hemm konġura biex il-kriminali vera li ordnaw dawn ir-reati jeħilsuha ħafif, u qalu li huma jafu li l-azzjonijiet ma tteħdux b’ordni diretta ta’ persuni prominenti li jridu jibżgħu għal xturhom.
Degiorgio qal li huma għaddew ħafna informazzjoni sensittiva lill-Ispettur Keith Arnaud li kellha tasal għand il-kummissarju tal-pulizija, l-avukat ġenerali, il-kabinett u l-president. Żied jgħid li din l-informazzjoni jafuha personalment u mhijiex xniegħa u li lesti jerġgħu jgħaddu din l-informazzjoni lil min verament irid isolvi dawn il-każijiet.
“Il-verità se toħroġ,” widdbu l-aħwa Degiorgio.
U għalhekk żgur li Joseph Muscat qed jiddispjaċih għaġeb għad-deċiżjoni li jiftaħ libell lil Christian Grima. Żgur li għandu msarnu f’saqajh issa li George Degiorgio qed jikkonferma li “ċerti individwi qed jilagħbuha tal-puri, iżda fil-verità għandhom ix-xitan.”
“Aħna verament irridu li l-familji tal-vittmi jsiru jafu l-verità kollha ħalli verament jemmnu li tista’ ssir ġustizzja ma’ dawk li kienu wara r-reati li aħna offrejna li nixhdu dwarhom,” żiedu jgħidu.
Mhux ta’ b’xejn li l-avukat ta’ Muscat, Pawlu Lia, oġġezzjona meta Degiorgio sarulu mistoqsijiet dwar l-involviment ta’ Keith Schembri fl-assassinju ta’ Caruana Galizia. Lia pprova jwaqqaf dawk il-mistoqsijiet, u sfida x’rilevanza għandhom għal-libell ta’ Muscat. Ngħid jien, għalfejn l-avukat ta’ Muscat qed jinkwieta li l-verità titla’ fil-wiċċ?
Keith Schembri kien ċempel lil Dr Adrian Vella u għaddielu ittra biex jgħaddiha lil Yorgen Fenech meta kien fil-kustodja tal-pulizija. Dik l-ittra allegatament tgħidlu kif għandu jixhet l-assassinju fuq l-eks ministru Chris Cardona.
Anki Dr Adrian Vella kellu jidher fuq il-pedana tax-xhieda fil-libell ta’ Muscat, iżda ma deherx. L-iskuża stramba talli ma deherx biex jixhed kienet li n-notifika tat-taħrika, maħruġa tliet ġimgħat qabel, “kienet għadha ddur minn marixxall għall-ieħor”.
L-aħwa Degiorgio jafu ferm iżjed dwar dak l-assassinju, u huma diġà qed jiddikjaraw li jafu iżjed.
L-allegazzjonijiet tagħhom, issa kkonfermati bil-ġurament, huma allarmanti. Huma qed jiddikjaraw li l-eks ministri Carmelo Abela u Chris Cardona kienu involuti fis-serqa sfrattata tal-2010 fl-HSBC u f’serqa fuq vann bil-flus f’Santa Venera.
Qalu li persuni politiċi f’karigi għoljin, inkluż ministri u persuni ta’ fiduċja, kienu involuti fl-assassinju ta’ Daphne Caruana Galizia.
Qed jgħidu li l-pulizija qed tiġri wara persuni innoċenti għall-assassinju filwaqt li l-assassini vera għandhom il-protezzjoni.
Qed jallegaw li l-informazzjoni sensittiva li għaddew lill-pulizija u lill-Prim Ministru Robert Abela qed tiġi injorata.
George Degiorgio kkonferma dan kollu bil-ġurament fil-Qorti.
L-aħwa Degiorgio iddikjaraw li jridu li toħroġ il-verità kollha. Huma wettqu reati orribbli, iżda xorta waħda għandhom l-opportunità li jagħtu daqsxejn għeluq.