‘Ikkoreġa’ dejta finanzjarja wara li l-gvern estenda s-sejħa għall-offerti tal-Evans

J - 08. October. 2023

This article is available in English

Wieħed mill-offerenti li qed jipprova jirbaħ il-konċessjoni tal-gvern biex jibdel il-binja ikonika tal-Evans fuq in-naħa t’isfel tal-Belt Valletta f’lukanda lussuża emenda l-kontijiet ippubblikati tiegħu sempliċiment l-għada li l-gvern iddeċieda għal għarrieda li jemenda d-data tas-sottomissjonijiet tas-sejħa għall-offerti.

Is-sejħa għall-offerti kienet mistennija tagħlaq fid-19 ta’ April, iżda l-gvern iddeċieda li fl-aħħar minuta jestendi d-data tal-għeluq tas-sottomissjonijiet għall-21 ta’ April u mbagħad, b’estensjoni oħra, sat-28 ta’ April. Fil-frattemp, wieħed mill-offerenti, Katari Hospitality, amenda l-kontijiet tiegħu u sab postu f’pożizzjoni aħjar li jirbaħ il-konċessjoni.

The Shift sab li minn fost is-seba’ offerenti li qed jissieltu għall-konċessjoni ta’ 65 sena, Katari Hospitality biss ħadu vantaġġ mill-estensjoni għax fl-20 ta’ April, jiġifieri l-għada li l-gvern iddeċieda li jestendi d-data tal-għeluq tas-sejħa għall-offerti, għamlu korrezzjonijiet fil-kontijiet tagħhom tal-2019 u tal-2020.

Skont ir-regoli tas-sejħa għall-offerti, l-offerenti għandhom jissodisfaw bosta rekwiżiti ekonomiċi, finanzjarji u tekniċi biex jikkwalifikaw. Il-kontijiet awditjati ppreżentati, kif hu meħtieġ mill-kumpaniji kull sena, huma kruċjali waqt il-proċess tal-evalwazzjoni meta jkun qed jiġi determinat jekk l-offerent partikolari jistax iwettaq l-obbligi tas-sejħa.

Minkejja li Katari Hospitality ippreżentaw l-ogħla offerta finanzjarja ta’ €40.7 miljun, il-bidliet li saru wara l-estensjoni jissuġġerixxu li, kieku ma ngħatatx din l-estensjoni tal-aħħar mument, il-konsorzju jaf ma kienx jissodisfa l-kriterji finanzjarji stretti msemmija fis-sejħa għall-offerti.

Meta mistoqsi biex jispjega għalfejn id-dejta finanzjarja tal-kontijiet tal-2019 u tal-2020 inbidlet l-għada li ngħatat l-estensjoni tal-proċess tat-tfigħ tal-offerti, Paul Attard, is-segretarju ġenerali tal-MDA fit-tmun ta’ GAP Holdings u l-uniku azzjonist ta’ Katari Hospitality, għażel li ma jweġibx.

Attard għażel li ma jgħidx lanqas jekk il-bidliet fil-kontijiet tal-kumpanija tiegħu mxewx skont prattiki aċċettabbli fil-qasam tal-kontabbiltà.

Il-Malta Business Registry juri korrezzjonijiet fil-kontijiet ippubblikati li saru l-għada tal-estensjoni tas-sejħa għall-offerti tal-Evans mill-OPM.

Ix-xahar l-ieħor, Attard bidel ukoll isem il-kumpanija tiegħu involuta fis-sejħa għall-offerti.

Minflok Katari Holdings, il-kumpanija sar jisimha Plan Property Holdings Ltd, u Attard hu l-uniku azzjonist tagħha.

Saru bidliet ukoll fil-memorandum u fl-artikoli tal-kumpanija, u sar trasferiment tal-ishma li involva aktar investimenti minn Attard.

The Shift ġie aċċertat li l-ebda wieħed mill-offerenti l-oħra li qed jissieltu għal din il-konċessjoni ma għamel bidliet fil-kontijiet tiegħu u f’dejta oħra direttament qabel jew wara li tħabbret l-estensjoni.

Meta mistoqsi biex jiddikjara jekk l-Uffiċċju tal-Prim Ministru, li hu responsabbli mill-proċess tal-evalwazzjoni, kienx jaf li Katari Holdings għamlu xi ‘korrezzjonijiet’, kelliem għall-prim ministru għażel li ma jikkummentax.

Lanqas ma qalilna jekk dik l-estensjoni kinitx intalbet minn Katari jew Attard.

Il-proċess tal-Evans se jieħu fit-tul

Biex ikompli jżid is-suspetti ta’ ndħil politiku f’dan il-proċess tal-għażla li għaddej, il-Prim Ministru Robert Abela għażel lill-Professur Assoċjat tal-Università Saviour Formosa, li jispeċjalizza fil-kriminoloġija, bħala ċ-chairman tal-kumitat kruċjali tal-evalwazzjoni.

Għażel ukoll lis-segretarji permanenti tal-gvern Matthew Vella (mill-Ministeru għall-Edukazzjoni), Sharlo Camilleri (mill-Ministeru għall-Biedja) u Godwin Mifsud (mill-Ministeru għat-Trasport).

L-ebda membru fil-kumitat tal-evalwazzjoni mhu magħruf li għandu xi għarfien espert fis-suġġett ta’ dawn il-proċessi tal-akkwist pubbliku. Fl-istess waqt, il-Ministeri għall-Finanzi, għat-Turiżmu u għall-Ekonomija tħallew barra.

Argument ewlieni ieħor hu li offerta baxxa partikolari li tefa’ l-konsorzju Valletta Luxury, li jinkludi lill-Grupp Decesare tal-Eden Leisure u lil Mark Weingard ta’ Iniala, skont offerenti oħra għandha tiġi skwalifikata għax ma tissodisfax ir-rekwiżiti finanzjarji minimi tas-sejħa għall-offerti.

Filwaqt li l-ogħla offerti finanzjarji tefgħuhom Katari Hospitality (€40.7 miljun) u Iconic Hotels Malta/ Nobu (€39.3 miljun), li fost l-investituri jinvolvu lil Julian u Veronica Zammit Tabona ta’ Arrigo Group, ħafna mill-proċess tal-għażla jistrieħ fuq l-aspett tekniku tal-offerta, u allura jinfetaħ għall-interpretazzjonijiet suġġettivi tal-kumitat tal-evalwazzjoni.

Ċertu lobbying mal-OPM mill-Grupp Seabank ta’ Silvio Debono (€20.9 miljun) u mill-Grupp AX ta’ Anġlu Xeureb (€22.6 miljun) qed jixħet pressjoni fuq il-prim ministru għax it-tnejn qed jargumentaw li għalkemm l-offerti finanzjarji tagħhom huma inqas minn ta’ ħaddieħor, huma superjuri fin-naħa teknika.

Attard, id-dejta finanzjarja u ġrajjiet oħra

Dawn il-prattiki mhux tas-soltu fil-qasam tal-kontabbiltà huma t-tieni eżempju bħal dan fi ftit xhur minn kumpaniji konnessi ma’ Paul Attard.

Ftit tax-xhur ilu, il-Qorti tal-Appell reġġgħet lura deċiżjoni li kien ħa l-gvern biex jagħti kuntratt ta’ €12-il miljun lil Attard għat-tmexxija tal-Isptar Zammit Clapp – istituzzjoni residenzjali pubblika għall-anzjani.

Minkejja l-kriterji finanzjarji stretti msejsa fuq il-kontijiet tal-passat u li abbażi tagħhom il-kumpanija Golden Care ta’ Attard kienet rebħet il-kuntratt, il-kumpanija rivali Care Malta – parti mill-Grupp Vassallo – iddikjarat li l-kumpanija ta’ Attard ma kinitx tissodisfa r-rekwiżiti finanzjarji tas-sejħa għall-offerti.

Meta sfida dan l-għoti tal-kuntratt fil-Qorti, il-Grupp Vassallo rnexxielu jwaqqgħu fl-appell meta l-Qorti ħassret il-kuntratt mogħti lil Attard, talli skont il-Qorti l-gvern kien interpreta ħażin ir-rekwiżiti tas-sejħa għall-offerti favur Golden Care.

Aktar kmieni din is-sena, Attard kien involut ukoll fi skandlu ieħor marbut ma’ art pubblika meta medda ta’ art kbira u ħadra fil-Mellieħa f’daqqa waħda ħarġet għall-bejgħ mill-Awtorità tal-Artijiet, bi klawsola li tiffavorixxi lis-segretarju ġenerali tal-MDA.

Minkejja l-oġġezzjonijiet li kienu saru, l-Awtorità tal-Artijiet xorta waħda tat l-art lil Attard b’termini ferm aktar baxxi meta mqabbla mar-rati fis-suq tal-proprjetà bħalissa.

Attard u sieħbu li kisbu l-art tal-Mellieħa, Paul Vella, magħruf bħala tal-Ballut, issa mistennija jbiddlu l-art fi blokok ta’ appartamenti.