Read the article in English here.

Permezz tal-Malta Tourism Authority (l-MTA), il-gvern qed jisfida d-deċiżjoni li ħa il-Kummissarju tad-Data Protection li tobbligaha tiżvela parzjalment l-ismijiet ta’ min gawda minn miljuni ta’ Ewro mill-fondi pubbliċi minħabba sponsorships għal parties privati, avvenimenti u kunċerti. 

L-MTA qed jassistiha Ryan Pace, avukat bi ftit esperjenza imma b’konoxxenzi tajba. Kien jaħdem mal-kumpannija legali privata tal-Prim Ministru Robert Abela. L-MTA ma tridx toqgħod għad-deċiżjoni tal-Kummissarju li lil The Shift, taha raġun parzjalment f’talba li għamlet bis-saħħa tal-Freedom of Information. 

Minflok, l-MTA, entità ffinanzjata minn fondi pubbliċi, varat sfida legali ġdida kontra The Shift u kontra l-Kummissarju tad-Data Protection: qed targumenta li jekk tiżvela kif qed jitqassmu l-fondi pubbliċi minn din l-awtorità tat-turiżmu, ikun hemm effett negattiv fuq l-interessi kummerċjali ta’ min ibbenefika minn dawn il-fondi. 

Is-sena l-oħra The Shift għamlet talba FOI u saqsiet lill-MTA biex toħroġ lista ta’ pagamenti li saru għal ‘events u sponsorships’ għas-snin 2019, 2020 u 2021.

L-MTA din it-talba ċaħditha mill-ewwel, għax qalet li billi l-informazzjoni kienet “kummerċjalment sensittiva”, ma kinitx taqa’ taħt ir-rekwiżiti tal-liġi FOI.

Minkejja li l-miljuni ta’ Ewro li ħallset l-MTA ħarġu mill-fondi ta’ min iħallas it-taxxa, u għalhekk in- nies għandhom dritt ikunu jafu it-taxxi tagħhom kif qed jonfoqhom il-gvern, l-MTA din l-informazzjoni baqgħet taħbiha. F’dan il-perijodu ta’ tlett snin, il-parti l-kbira minnhom iddominati mill-pandemija, jingħad li ġew allokati l-fondi lil mitejn u żewġ event. 

The Shift għamlet sejħa għall-investigazzjoni u saħqet li l-gvern, informazzjoni bħal din ma jistax jaħbiha, speċjalment jekk l-istandards tat-trasparenza u l-kontabilità huwa kommess għalihom. Il-Kummissarju tad-Data, din it-talba qabel magħha parzjalment, u lill-MTA ordnalha tagħti d-dettalji ta’ kull event li sponsorjat, mingħajr ma tikxef l-ammont preċiż li ħallset mill-fondi pubbliċi.

Imma l-MTA din id-deċiżjoni tal-Kummissarju tad-Data xorta mhux qed tobdiha, u permezz ta’ Ryan Pace – imħallas hu wkoll mill-fondi pubbliċi –  qed tinsisti li din id-deċiżjoni ma tibqax tgħodd. 

Din it-talba għall-informazzjoni dwar il-mod kif l-MTA, il-fondi pubbliċi qed tużahom, għamlitha The Shift wara li dan il-portal tal-aħbarijiet żvela diversi każi kif fl-2017 u fl-2018, l-MTA berbqet il-miljuni ta’ Ewro. 

Il-kontijiet tal-MTA investigahom il-Kumitat tal-Kontijiet Pubbliċi, u ġie żvelat li l-organizzaturi tal-parties u l-kumpanniji b’konnessjonijiet mill-viċin mal-gvern Laburista, kienu qed jingħataw mijiet ta’ eluf ta’ Ewro biex jorganizzaw il-parties, speċjalment fis-sajf, għal taparsi biex lit-turisti jattirawhom lejn Malta: imma f’dan iż-żmien tas-sajf Malta xorta jkollna ħafna turisti. 

The Shift kienet żvelat li kienu qed jingħataw il-miljuni ta’ Ewro mill-fondi pubbliċi lill-grupp żgħir ta’ organizzaturi: lil Gerald Debono (magħruf bħala Gerry), lil Trevor Camilleri, lil Nicholas Spiteri u lil Edward Zammit Tabona tal-Fortina, li kien qed jaħdem bl-isem 365 Entertainment Group u kumpanniji oħra msieħba.

Kien hemm benefiċjarju kbir ieħor, l-NNG Promotions: fiha kien hemm Nigel Camilleri, Jonastin Zammit u l-ex kap tal-PBS Anton Attard: dawn kollha kienu qed jirċievu sponsorships kbar, inkluż il-kunċert annwali tat-tenur Joseph Calleja, imniedi mill-gvern. 

Kien ġie żvelat ukoll li l-parti l-kbira ta’ dawn l-isponsorships kienu qed isiru permezz ta’ Lionel Gerada, il-Head of Events tal-MTA. Dan kien impostur ikkundannat u ‘person of trust’ tal-ex Ministru diżonorat Konrad Mizzi, u kienu tawh post ta’ kap fl-MTA.

The Shift kienet irrappurtat li f’sena waħda biss, l-infiq tal-MTA għall-isponsorships kien tela’ minn żewġ miljun Ewro għal sitt miljun Ewro. 

The Shift għandha informazzjoni li fit-tliet snin li għaddew, il-parti l-kbira ta’ dawn l-organizzaturi tal-events ibbenefikaw ukoll minn eluf kbar oħra ta’ Ewro, u diġà ‘kkapparraw’ ammonti kbar ta’ fondi pubbliċi fi sponsorships għal events varji li se jsiru dis-sena.

Imma s’issa, l-MTA għadha qed tinsisti illi lill-pubbliku mhux se tinfurmah  dawn il-fondi kif qed tamministrahom. 

U bis-saħħa tal-Avukati BCGL The Shift se tagħmel is-sottomissjonijiet tagħha lit-Tribunal tal-Appelli kontra din l-isfida legali li qed jagħmel il-gvern.